GHINEANNAMCHO DIVO

GHINEANNAMCHO DIVO


Astanam Ami
Bhurge Lhan
Maim Pain
Ghalun Eskolan,
Kele Amkam
Teacherichea Hatan…

Sukh Zalem Khobar
Disbhor Lissanv
Homework Kitloch Ditali
Teacher Ti Pemsanv,
Rag Tokler Mari
Aikolearuch Tichem Nanv…

Homework Korinam Tor
Teacherik Rag Chodtalo
Headmaster Maink Vo Paik
Apounk Dhadtalo,
Tednam Eskolant Tossoch
Gharai Mar Podtalo…


Sonvarachem Eskol
Borem Distalem
Aitarachem Zaitem
Khellonk Melltalem,
Somarak Portun Vochunk
Kalliz Dukhamnim Rodtalem…


Ami Lhan Astanam
Eskolacho Valor Gomonam
Teacher Sangta Tem
Ami Kanar Dourinam,
Eskol Ani Teacher
Dista Sogllem Fokannam....


Kitlo Tokos Gheun
Teacher Amkam Xinkoita
Tichea Ghiniannan
Amchem Ghinnian Vadoita,
Teacher Mhuntlear Uzvadd,
Sounsarant Chollonk Rosto Dakoita…


Desacho President Vo Konnuim To Zanv
Tache Fattlean Teachericho Hatt Asta
Tiche Ami Sodanch Upkari
Tinnem Kelele Sacrifis Aiz Amkam Dista,
Teacher Ek Vati Porim Lassun
Bhurgeamcho GHINEANNAMCHO DIVO Petoita.


- Cajetan Godinho

GULAB ANINK GANJIL

GULAB ANINK GANJIL

Ghara fuddlean
Fulbhagint
Roil'lo anvem gulab
Vaddon aiz
Vhodd zala
Tachi suropai
Aninkui vaddlea
Taka ek
Sobit sundor
Gulab ful'la

Gulab to
Itlo sundor
Itlo pormollit
Tacho pormoll
Sogleak ximpoddla
Kantte assun
Torui pun
Mogachem git
gunngunnait
Ek ganjil taka bul'la

Mhonllem gulaban
Mog mozo
Assa tuka
Tor mottean
Git korinaka
Lohu lohu
Nam kollttam
Ekech zompoien
Uklun tum
Vor maka

Ganjilan mhonllem
Mojea utrank
Bai tum bulom naka
Talank mojea alonaka
Ganjil aum
Zannam zau
Fulam astat
Thuim mus distat
Hem bai
Tum visronaka

Cypriano Fernandes (Riyadh, K. S. A.)

Xanneponnam ani pixeponnam - “Hi Rakxinn Bail Tugeli”?

Xanneponnam ani pixeponnam
“Hi Rakxinn Bail Tugeli”?



Kalche rati
Ghova lagim zhogoddli
Aiz sokallim
Ghovak sangonastanam
Misak vochun aili.

Kalche rati
Ghova kodde zhogoddli
Aiz disbhor
Taka zap dinastanam
Ogi-ogi ravli.

Sotavpak
Tapovpak
Aiz tika ghov nam
Dekhun char Ters
Rozar korit asli.

“... Ami amcher
chukloleank
Bhogxitanv”
Char Tersant
20 pavtti
Amchea Bapa
Vhoddlean mhonntali
Ghorantlea ghorkaraxim
Sarki moni ravli.

Kalche rati
Ghova kodde
Aichea disa Sune kodde
Falchea disa xezaream kodde
Padr Vigara kodde
Borich zhogoddli
Punn Pap Saiba khatir
Ek A. B. N. Mori
Rozar korunk
Kednach, aiz legun
Nam visorli.

Kalche rati
Derepent meli
Sam Pedru kodde
Zhogddim kortanam
Mhaka avchit
Disti poddli.

“Hi rakxinn bail
Tugeli re???”
Sant Pedrun
Mhaka vicharlem
“ Nam Saiba
Nam Saiba”
Hanvem vhoddlean
Ani nettan gazoilem.

“Romeo, sopnetai re?”
Fanteaparar
Gopant yeun
Bailen muzgailem.


- Romeo Almeida

Fouz Moriechi, Gõyant Fankli

Fouz Moriechi, Gõyant Fankli
(Legion of Mary)


Setembrache 7ver 1921 vorsa zolmant aili
Poili zolmant Dublin Ireland xarant aili
15 bailo ek Atmik Guru, ek dadlo hannim keli.
Aiz soglea sonvsarak Mariechi Fouz pavli.

Novembrant 1952 vorsa Gõyant suru zali
Asaganv Mhapxeam, Norman ani Cecilian kelem
Tanchea udexim Mariechi Fouz iesvont zali
Devachi vhoddvik-mhoima zaundi.

Legionar vangddi, Dhoniachi dakhoitat vatt
Kitlench dukh ani tras zalearui fattim ravonant
Bori budh dinvcheak chintat dis, rat
Peleachi seva korunk korinant kedinch fatt.

Sogllea mhojea bhav- bhoinnank maie mogacho ulo
Marieche Fouzecho vangddi tunvem zauncho
Saibinnicho axirvad tumcher astolo
Hem mhojem magnnem, mhozo anvddo.

- Anthony Barbosa

Kalljidar V.Ixtt To...

Kalljidar V.Ixtt To...


Sota khatir zhuztolo kalljidar V.Ixtt mhozo
Nitik dolle ugoddtolo sot lipouncho na koso
Padri vo madri zaun sot tench uzvaddaupi khoro
Kalljidarponnam, bhienastana nitik rauta ubo

Pilar sonvsthon samball’la tuka aiz khal sodankhal
Adlim boroupam sudharun boldilea novi chal
Ruch vaddlea boroupam vachun tujim rosall
Itlea vorsamcho sotor panch V.Ixtt fulot veta aiz khal.

V.Ixtt tum amchea sogleam Gõykarancho
Bori khobor gevun sodanch darant ubo raucho
kedna-i gulam zainaka sot lipoitoleancho
Apurbaiecho vavraddeancho Ixtt tum amcho.

Sobit sundor moladikh thik tum Gõykaranchem
Gõymkaranchea kallzant sodanch likhlikhchem
V.Ixtt atam sogleancheach ghorant pauchem
sonvsar somplo porian amche modem rauchem.


- Jose Mario Pereira. Majorda.

Mhojea Ixtt-ak

Mhojea Ixtt-ak


Ixtt-a aiz tuka 75 vorsam
ani mhaka 65 vorsam
Tum 10 vorsamnim vhodd
ami khub kitem pollelem
khub kitem sonslem
Zoddlem ani moddlem
ek bhas ghoddoili
ek bhas fuloili
ek novem Rajyo ghoddlem.
Kovi gavpi, ulovpi, nachpi,
khellpi, kolakar, chitrkar
Tiatr nattkam, gitam,
zagor, fugddi, dhalo,
mandde, dulpodam, adi.
Xennoi Gõybab amcho foler
tannench vatt dakhoili
te vatten ami cholot aile
Ixtt-a tuka yad asa to Dev-monis
Tuzo sompadpi
Pri. Lactancio Almeida
taka hanv koso visrom?
Tannench mhojem ek pustok
‘ Tumchi Bholaiki Tumchea Hatant’
chhapun mhaka bhett dili.
Taka hanv koso visrom?

- Bicaji Ganecar

Vavraddeanchea Ixttachem Stutgit

Omrut Utsova somoiar
Vavraddeanchea Ixttachem Stutgit


Dp.:Potr amchem, vavraddianchem,
Potr amchem, Gõykaranchem,
Soglleanchea ekvottachem,
Devachem dennem vortem!

1. Seva keli IXTTAN
bhavponnachea mogan,
koxtti jivit jieun,
bollixttanchea dhiran!

2. Uzvaddailim monam,
hurben bhôrlim kallzam,
sakxi dili Sotak,
govai dili Mogak.

3. Khobrô amchea ganvcheô,
batmiô sonvsaracheô,
soglleank zagrut korunk
lokak vachunk dileô.

4. Gõychem nanvrup samball’n,
Konknni bhaxek ubar’n,
Gõychi rakhli grestkai,
eklich êk osmitai.

5. Vavraddianchea Ixtta,
Vavraddianchea Bhava,.
sogtta pasot Tuka,
Jezu, dhin’vas mhoima!


- Vasco do Rego s.j.

Madar Thereza

Madar Thereza



Zolmacho ganv soddun , Indiek aili
Calcutta ravon konn nasleleamchi seva keli
Avoi bapui naslelim, gorib onath bhurgeank
Tujea ashramnt haddun, mog dilo
Tankam jivit dilem
Sogleamchi maim zaun
Ek ghorabo koso vaddoilim.

Poixeamchi goroz khub asli
Ful nam paklli diunk bik magtali
Zompodpotteo (slum areas) cholon bhovon
Ek-ekleachi khobor ghetali.

Ek dis
Eka girest monxea kodde geli
Apleam gorib bhurgeank adar dhi
Oxem mhunnon hath ukoddle ani bik magli
Girest, chatto, sugrati monis to
Rag ieun, tichea hatar timpi uddoili
Madar Therezak rag ieunk nam
“ Tuka Dev borem korum” mhunnon fuddem uloili
“ Mhaka dileim, punn mhojea bhurgeank
Tunvem kainch diunk nam”.

Don minut ogich ravlo, kalliz churchurlem
Mon bodol’lem, chukichem bhogsonnem maglem.
Bhitor vochun kitlech duddu haddun tichea hatant ghale
Kedem Ojap!
Fokot thoddeam utramnni, Madar Therezan
Fatra sarkem kalliz movall kelem

- Anthony E. F Rebello (Corjuem)

Aiz Mhaka, Faleam Tuka

Aiz Mhaka, Faleam Tuka



Bailecho ghov ani bhurgeancho bapui hanv,
Sonvsaracho ghoddo dukllunk hanga-thoim marli dhanv
Bhurgeank jevonn-khann dilem, mottem-barik zanv
Mhoje koxtt, atte-vitte zannam sogllo ganv.
Bhurgeank voir kaddunk aslem -naslem vomplem
Sangatak hanvem ani ghorkan’nin ghaman jivit ximplem
Bhurge kazar zatoch, pollevnk lagle ap-aplem
Amchea koxttanchem foll itleanuch somplem.
Dis-rat koxtti vavr korun hat-paimank aili gumzann
Dislem naka sonvsar zhuztanam jivitantlim zhuzam.
Gorvan bhurgeanchi vhoddvik sangtalom voir kaddun buzam
Kovate ximpun vhodd kele, pik zali vanzam.
Ganttik kainch nam zavn, bhuken kaddunk poddleo oddi,
Bholaiki bigddon, somadhan nam ek-ui goddi
Put-suno kenddtat, kiteal kai mhonn heo nodi
Amkam kalloki sonvsar, jivitacho suria pavlo poltoddi.
Atam azilant vhoron soddlea bailek ani mhaka
Putank-sunank ami zanntim naka
Hem vhodd dukh bhogtelem konnak ghoddlam poi taka
Niallum-ia! “Putamno! Sunamno!”, aiz mhaka,
faleam tuka.


- Santan H. Viegas

Tor konn re te !!!

Tor konn re te!!!


I
Haddlele tumkam nivddun,
Amchea ugtea-khorea monan,
Asleanv tumcher patiyeun
choloitele mhunn visvasan
Gõychea karbarachi chavi
Dileli ami tumchea hatant
Punn amchech zavn tumi
Amkam ghaltat fonddant

II
Rit, mansugi, udarponn
Ghalem tumi dobeant
Dilele podvek marun veng
Sotaitat amkam ganvaleank
vikrek kaddlam amchem Gõy
Bhul’le porkeancheam duddvank
Bolos bhorit asa aplench
Fottovn amkam niz Gõykarank.

III
Zagrut rab re Gõykar bhava
Kodelir boson asleleanchi
Korum naka kudd’ddi seva
Dovor tankam damun
Dium naka kaide moddunk
Nam tor tech amchim khebaddam
kortele, mhonnit “Rum-pa-pa-dumppa!
Gõykar panv valea!”

- Lucas Cardozo