Thursday, December 13, 2007

MONTREANCHIM NATALAM



Poileach Pavtt Goenchea Itihasant
MONTREANCHIM NATALAM



Khella Montri zala Christmas fadar
Sogleach toreche khell Goeant addleat
Krixi Montri choddla vankddea maddar
Kunsvar vantt’tunk narl sovai dovorleat

Uzvaddachi porob, zai titli lait vapor
Bizle montreancho ‘fuse’ khoi tori xenn’la
Natal gotto toiar korpak vorixtt rukh kator
Ran Montrean akhil Goem spordha dovorlea.

Tandul, sakor, ghee hea vorsak ration dobrad
Vepar Montreanche soire Natalank ghantar gheleat
Pot bor kha nevreo, manddare, bibik, perrad
Duddvam Montrean goribacheo chullio pettoileat

Modian ratri misa uprant kamara haloit nach nach
Poriotton* Montrean avaz bondi horam choddoileant
Dansak boroch soro pievn motor choloit voch voch
Rostear kondd asat titleach Vahatuk Montrean puroileat

Natalanche sumanan ghanv ghavanim zatleo karriavoli
Kormonnuk Monrtri fugddeo ghalun nachunk ietele
Dezembrachea ektis, vorsachea nimnne tarker
‘Old man’ korun Ali Baba cheallis chorank ulpaitele

Lino B. Dourado
(Utord’dekar-Kuwait)


Poriotton -Tourism
=====


http://www.goa-world.com

BOLKANVANCHEA HUMBREAR



V. IXTT-ar uzvaddak ail'li kovita. Dezembr 7vi,2002


BOLKANVANCHEA HUMBREAR



Donparchem jevonn zalea uprant
Xezarnneo bolkanvanchea umbrear bostaleo
Jinsavar aileo-poileo khobro korun
Eka-mekache matheaveleo u’uvo kaddtaleo

Vaddeantlo konnui duent aslear
U’uvo kaddtanam zataleo gozali
Sanjechi chav ghetle uprant
Duent asleleank bhettunk vetalim

Ponn atam, donparchea vellar
TVcher ieta lokpriya serial
Adim, bosun bolkanvanchea umbrear
Sonvsarik khobro astaleo bailanchea mathear

Voilea ponnsa vaddeantlem cheddum
Sokoilea vaddeantlea cheddea fattlean
Forsuchi okol dollea add korun
Durga kuxik sampoddli Kaituchea gopant

Eklich ghorant, ghov ticho asa tarvar
Kumpar ailo mhonntat, mellunk soiro ailear
Borem navn khobro korun uboitalint varear
U’uvo kaddtana bolkanvanchea umbrear

Tori-i astana adlea xezaream modem
Aplea vaddeantlea lokachi vaspus astali
Atam 'cable' ttivi ghoramni gusun
Xezaranchi ixttagotuch chorun veli.

Lino B. Dourado
(Utord’dekar-Kuwait)

"TUZIM XEOKTI"



"TUZIM XEOKTI"


Vho! Sodvondara tuzeam kurpechem,
Saiba, dim amkam vordan
Koxtt, dukh, durbollkaim pois korunk
Dim amkam tuzim xeokti mahan.


Amcheach dukhanim, amim budleat
Dukhar amcheam tuzo varo mar
Tuzeam nanvan amim jietat
Amcher tuzim kakutichim kurpa dad

Vod vidvan, pondit, tuzem korari
Amim durboll munis tuzem pujeari
Amchem dukh, somadan, tuzi bokti
Oskot amcheam monak dim tuzim yukti.


Vho! Rochnara! Dim amkam tuzim,
Doeam, drixtti anik podvi
Vaitta, vignnak amim tond diunk
Amcheam jivitant dim tuzi xanti.


- MARIANO LUCAS DINIZ.
lucasdniz at hotmail.com

- www.goa-world.com

S U K N N E M


S U K N N E M



Ago supurlea suknnea
Ghontterant mhojea ieo
Bhitor tum ietna
Pakam fuloit ieo.

Tujea pakotte savllean
Mogachi jot* petoi
Svadik moddur nadar
Bhitorlim bhavna zagoi.

Svontrontr varear uddun
Kiteak bexttench toktai?
Agnnant mhojea ievpak
Kiteak tum loztai?

Havn ek nirvasi*
Tujea sangatak axelam
Kor mhaka dadoxi
Ekmude jivitak nirxelam.

Tum ailem zalear
Jinn mhoji bodollteli
Eksuro prannicho jiv
Anandache bhuimer nachteli.

Lino B. Dourado
(Utord'dekar-Kuwait)

Jot -flame
Nirvasi -refugee


=====
http://www.goa-world.com/konkani/poems

Other links to Konkani poems:
www.gulabonline.com
www.v-ixtt.com
www.goa-world.com/konkani/
www.konkanidiaz.com
www.gulabonline.com

PRARTHONA



PRARTHONA



Dev mondirant bhitor sortana
Lokak dakounk turturi vazoinaka
Isvorachi sthuti vhoddlean gaitana
Dusmanacho mog khorcheak visrunaka

Retir kelo, upas dorle, praiochit kelem
Ghora kodean bhav-bhoinink dukoita
Bukel’leank jevonn, vingleank nessunk dilem
Iogdan ditana sonvsarak zagoita

Rat bor dimber poddun, hat uklun Devak argam
Dis bor xezaream thaim zogddim-zhuzam
Kalliz nitoll dovor kirlainaka niddukaichim follam
Mon melem asot, Dev aikona prarthona

Lino B. Dourado
(Utord’dekar Kuwait)

=====
Lino B. Dourado's kovita ghelo at:
http://www.goa-world.com

EK GOENKAR SORGINCHEA DARVONTTEAR


EK GOENKAR SORGINCHEA DARVONTTEAR



Mhojo atmo kalche ratik sorginchea darvonttear
Ek vhoddlo piklelea kaddacho, korunk laglo vinchar
“Pora! Khoim thavn aila, sang vegim, vell korinaka
piddear
Tujim soglim patkam boroilolim asat zott’tieche
pustokar"

Fott sangli, podlom trasant, sotuch uloilear borem
Saiba, hanv aila thavtin borem chollona gha varem
Sorkari bikaranchea bolsani nigut poddunk zai sarem
Oxem korit tor, soglim tuji kama, tabortob khortat
purem

Ali Baba cheallis chor, amche sorkarak mhonntat
Broxttacher korpak Bharotachea poilea zagear urtat
Lonch ghevpakui fattim nant, khunn-chorio vaddttat
Kaidean cholchi tor, suke angar,funkot fator podtat

Amche sorkari korcherint borleat ani distat sogleach
voile
Nove karkaneam aileat, amkam nokri dita mhonn fottoile
Nivddun ail’le montri-amdar, tanchea duddvank gha
bhul'le
Mhoje fattlean urleat, tanche dis bore nant fuddle

“Puro puro, fuddlem ulovpachem bond kor”,
hat dorlo mhoje tonddar
“Somzolom khoimchea Rajeantlo,
tum zavn asa ek Goenkar
Dog adlea 'politician', tumchea patkank lagun
azun pavonant sorgar"
Ek Opinion poll-acho pai Jack Sequeira ani dusro
poilo mukhel montri Bhau Saib Bandodkar

Lino B. Dourado
(Utord'dekar-Kuwait)

www.goa-world.com

SIOLIM-CHOPDEM PULLACHEM RUDAN


SIOLIM-CHOPDEM PULLACHEM RUDAN



Deva mhojea
Mhaka sambal gha
Mhojea velean boreach
Pavsall vochum dhi gha.

MANDOVI bhoinichi
Iad etoch
Bhirantin mhoje
Paim kulkultat.

ZUARI bhavachi
Oskatai pollovn
Angak mhojea
Kantte toptat.

Lokachi xeva korcheak
Mhaka ubo kela
Vorsam borchea adinch
Sokoll udoi-i naka.

Deva mhojea
Mhojea churchure kor gha
Porjea khatiruch
Mhaka sambal gha.

Lino B. Dourado
(Utord'dekar-Goem)

www.goa-world.com/konkani/poems/

Link article:
http://groups.yahoo.com/group/goanet2/message/172

POROT AILI PIDDA



Eka Bebddeachem Rudan, Kovita Rupan
-----------------------------------


POROT AILI PIDDA

Aileat tumi ieat-ieat patrao,
bosat goribachea bankar
Okosmat ievnchem podlem nhoim,
matxea zatlem kustar
Ghorcheank gomoitam,
tumchea boreaponan asat tim sukhar
Tumchi toknai kortat titlich thodi,
porot bhik magunk lokachea dharar


Ghavantlea soglea rostear,
ekui fond bilkul disona
Bizlea kambear sodanch uzvadd,
kednach kallok asona
Bhurgim amchim khuxeal asat,
bandleat khella maidana
Nollant zori baxen udok danvta,
chuckon passun sukona


Konn sangta tumi broxttachar(1)
korpi mhonn?
Sokalchea dova baxen nitoll,
ontorskon asta tumchem
Porjechea duddvani bandleat bongle,
mhotlem konem?
Tumchea matear asta Goeamche
sudaropachem vozem


Dongravelea panchvi(2)zhaddank,
tumi udkant ximptat
Dekhunuch thoimchi zanvaram,
kedea ghanvani distat
Tumi nodivelea pullachea kabeank,
ghott'tt dorun asat
Tea khatiruch bosivelean devun,
porja chollun votat


Tumi Goem sarkench adhunik(3)kelam,
amchi porbim tumkam
Doriak vochpachea vatter,
hotelkarani bandleant durgam
Soimbik doria vell disona,
atam distat fokt bildigam
Xant ghavant, hotelachea melsanin,
bitor sorleat kimsam


Tumi ekuch zagear astat,
makdam baxen udkeo ghenant
Hea khatiruch nov vorsa modem,
tera pavtti vechnuko zaleat
Rajkanni(4) angostram galunuch zolmotat,
nagddea zolmank ienant
Hakach lagun monxeak irlixi loz mhotleli asa,
hem tumi visorleat


Tumi az cholun aileat, churchure,
porjea katir tras, amkam dolleanni dista
Zaitem sanglam ami aikolam,
nivddun ailea mhontoch ogech nhida
Az mot magpak bikari zaleat,
faleam kodelak lagun zogddun montri zata
Ho ek bebdo char dis suko(5)
konank lagun eleisanvamchi porot aili pidda?



Lino B. Dourado
(Utord'dekar-Kuwait)


1) Corruption
2) Greenery
3) Modern
4) Politicians
5) eleisanvam adim ani uprant sorea baram bond astat
tedna

- Forwarded by www.goa-world.com

GOEMKARAM MODEM EKVOTT NA?



Ek niall kovita rupan

GOEMKARAM MODEM EKVOTT NA?

Padri Jose Vazak Altaracho mann gaulo mhonnon
Sorgim Bap’pan Taka sanglem, mag ani meltelem
Goeamchea bhav-bhoinacho Taka khub mog aslelean
Tanem emkondant lastelea otmeank bhettunk maglem

Khor ujeant lastelea gorvist Goemkarank pollovn
Bhagevont Jose kallzak vhodd dukh zali
Zata zalear hea nixtur ujeantlea salvar korunk
Tannem Bap’pa lagim khaltikaien vinonti keli

Utor dhil’lem mhonn Bap’pan Taka borem mhotlem
Ekuch minute ditam fuddem godieal bond zatlem
Padri Josen Goemkarank vegoveg voir ievnk maglem
Goemkar kitlo sohokar divpi tem Taka sozmun ailem

Bollixt* asleleani voir ievpak apli goti* choddoili
Voir sortoleache dongeank dorun dusro ghot’tt veng
mari
Voir sortat tankam voir ievnk dhiat Tannem bob marli
To nirxello* ekloi voir pavunk na minute dhil’li
sompli

Voir sortoleak patimbo* dhivcho
Xikovni melta monisponnachea pustokar
Ponn Kristi Goemkar duxit* chintnacho
Amchea sorbhovtoni asat ani meltat sabar

Goemkar apli bhas, sonvskrutai*, osmitai*
Barrabor vorta jogantlea soglea svater
Sonvsarantuch nhoim ponn norkant* pasun
Addo ghalpi asat khoim dusreachea vatter


Lino B. Dourado
(Utord’dekar-Kuwait)

Bollixt-Strong
Goti-speed
Nirxello-disappointed
Patimbo-Support
Duxit-polluted
Sonvskrutai-culture
Osmita-identity
Norkant-Infernant

- Forwarded by www.goa-world.com/konkani/

KAVLLO RODDTTA TEDNA




KAVLLO RODDTTA TEDNA


Fantoddear ghorar roddot tor kavllo
Mhonntat, aiz jerul konn tori soiro et'lo
Sot zata, soiro pavta, lagsilo na tor poisilo
Xevttak, chitt tori gheun etlo postman ghavantlo

Kavllean, eka Xen'varak ghorar ghatlo boval
Nhidonk dhivn na piddear suttiocho sokal
Kavllea, udon voch re korench tum mogal
Dusrea pavtt ailear xasvot (1) kortolom ghaieal

Juneacho mhoino, pavsa adoll-modd suntil'lem
Konn eklem poisil'lean pavsan bizon etlem pollelem
Langim pavtta-pavtta taka pollovn kalliz korkorlem
Xallent xiktana premi' pustokak matxea xirkovlelem

Tacho vistid pavsan bizon angar bosla chitkon
Zoglavnem marlem tedna dollea tiche ghele dipkon
Godgodachea avazan mhojea golleak veng marli bivon
Kavllea mhojea mama, oxoch sodanch ieo re roddon

Bizlolea kopddea boldi khorpak tika poratlem
Novem kalsanv-kumis addun tichea murean udoilem
Tinnem dollea pitpittaun dolleanche pitkulean
bodbodlem
Bhitorleo bi mustaiki bizloleo asat tanchem korchem
khitem?

Lino B. Dourado
(Utord'dekar-Kuwait)

(1) Permanent

Ugdass Konkani bhasacho


Ugdass Konkani bhasacho


Aiz bortat pondra vorsam, Konkani bhas amchi zalear
raj bhas,
Kitleo pilgeo somplio avoi bhas zaun asa Konkani.

Goenche ami putt Konkani bhaxea amchem rup,
Fuim ami asum zaum Goem vo bair,
Goenkar mudon pacharunk zata focot uloilear ami
Konkani.

Borounk eta koxe lipin romani vo devnagrin
punn lozo nakat ulouvonk ti avoi bhas amchi konkani.
Xinkonk eta zaiteo baxeo punn visronakai xinkonk
burgeank amchi bhas Konkani.


Jerson Vaz
(Cuncolim / Saudi Arabia)

Sorpatel




SORPATEL


Mis somptokoch Paskanche Aitarak
Camil baban katorlo tuntunit dukrak
Ruch aili tik-tik sorpatel khavpak
Don kilo sanglem potantlem divpak

Ghora vorun potantlem borem dhuilem
Tovlean ghalun chullir xizonk dovorlem
Sundorem dhimpram kovlun addolir boslem
Gond, kopiz, kan, xempddi barik katrunk laglem

Vhoddle dhuven rogddear vantt'tunk ghatlo mosalo
Dakttea poran dukam goloit pieav katorlo
Hanv tovlean tel votoun arlem-lossun baztalo
Amcho 'brownie' kutro xempdi haloit kuznant guslo

Dumdumit pormoll ubblo ak'kea vaddeant
Xezareank gomlem sorpatel xizta amche ghorant
Porbeachi kazu feni, kola sangata votli glassant
Umedin toiar ravlom sorpatel duklunk pottant

Sorpatel chulli velem bhitor adpak ukum ailo
Tisro kazu peg-ar aslom netan kuznant pavlom
Tovli hatant dovrun zen'na hanv fatim voulo
Brownie paink guspon tauli soit zom'nir xevtolom

Lino B. Dourado
(Utord'dekar-Kuwait)

GHINEANNAMCHO DIVO


GHINEANNAMCHO DIVO




Astanam Ami

Bhurge Lhan

Maim Pain

Ghalun Eskolan,

Kele Amkam

Teacherichea Hatan…



Sukh Zalem Khobar

Disbhor Lissanv

Homework Kitloch Ditali

Teacher Ti Pemsanv,

Rag Tokler Mari

Aikolearuch Tichem Nanv…



Homework Korinam Tor

Teacherik Rag Chodtalo

Headmaster Maink Vo Paik

Apounk Dhadtalo,

Tednam Eskolant Tossoch

Gharai Mar Podtalo…



Sonvarachem Eskol

Borem Distalem

Aitarachem Zaitem

Khellonk Melltalem,

Somarak Portun Vochunk

Kalliz Dukhamnim Rodtalem…



Ami Lhan Astanam

Eskolacho Valor Gomonam

Teacher Sangta Tem

Ami Kanar Dourinam,

Eskol Ani Teacher

Dista Sogllem Fokannam....




Kitlo Tokos Gheun

Teacher Amkam Xinkoita

Tichea Ghiniannan

Amchem Ghinnian Vadoita,

Teacher Mhuntlear Uzvadd,

Sounsarant Chollonk Rosto Dakoita…



Desacho President Vo Konnuim To Zanv

Tache Fattlean Teachericho Hatt Asta

Tiche Ami Sodanch Upkari

Tinnem Kelele Sacrifis Aiz Amkam Dista,

Teacher Ek Vati Porim Lassun

Bhurgeamcho GHINEANNAMCHO DIVO Petoita….


Boroupi/Written by: Cajetan Godinho
– soccer legend at Soor Grounds - Kuwait
http://www.goa-world.com/goa/tiatr/cajetansartwork.htm
(c) www.goa-world.com 12/09/2005

NOVEA VORSAK EVKAR DITNAM



NOVEA VORSAK EVKAR DITNAM



Novea vorsak evkar ditnam
Sortelea vorsacher il'li nodor marumea
Jinnecho koso ami upeog kela
Ek khinn bhor matxe monant golloumea

Kelea ami xeva ghoribak
Dila adhar mozot magteleak
Ghatlam on'n bhuken vollvollteleak
Udka tembo jibecher tanel'leak

Dilam bhiradd ghor sodteleak
Dilam nesunk vingllo asleleak
Paula akantak konn nasleleak
Dakoila rosto vatt chukleleak

Nam Jezu nam, soglem hem
Hanv visrun ghelom
Hi jinnechi vatt cholot astanam
Khud mojea svarta passot melom

Devachea ghorant sodanch poilo
Punn sumurtiche kaide pallunk nam
Vatter ghorib bhikarn bhik mago
Punn kotten tiche att annem ghalunk nam

Rosteavelim lhan bhurgim fattik lago
Hatanim khunna korun khaunk mago
Punn kaliz mojem vollunk nam
Him misam, tim retiram korunuim
Hacher kednanch niallunk nam

Punn atam novea vorsak evkar ditnam
Monachem hea bodlop kortam
Fattim ghalun svartiponachim chintnam
Novea vorsant novem paul martam

Cypriano Fernandes (Riyadh, K.S.A.)
www.goa-world.com/goa/

Season's Greetings from Gulf Goans e-Newsletter. Moderator: Gaspar Almeida
Presented by Ulysses Menezes www.goa-world.com/goa/ since 1994

UPKARACHEM OJJEM


UPKARACHEM OJJEM

Zolmant Etoch
Ami Eka Mekache,
Upkaramche Soire Zatat…
Nam Tor Niallun Poi
Jivit Jietanam Kitle Zan Amcher,
Lhan Vhodle Upkar Kortat…
Toddezan Kallzant
Dinvas Dovortat,
Todde Onopkari Visortat…
Zaite Zan Mothlobi
Upkar Korun Dusreak,
Jivitbor Aplo Ghulam Mhunon Sozmotat…
Gorjevontamcher
Ghodta Mhunon,
Upkar Tum Khortai…
Chintinastana Ghorvan Bhoron
Ganvchea Tinttear,
Soglleamkuch Sangon Dhitai…
Ixttagot Munispon
Devosponamcho Kaido,
Tum Visortai…
Piso Tum Dusreachi Goroz
Kednanch Tuka Podchinam,
Oxem Tum Sozmotai…
Devache kurpen Ghodta mhunon,
Dusreak Adhar Tum Dhitolo…
Kednaim Pun Ghodta Tedna
Upkar Tuzo Farik To Kortolo,
Nam Tor Kallzant Sodanch Dinvas Dovortolo…
Punn Chint Munxea Jivit Somptoch
Simiterint Tuka Vhoronk,
Dusreak Tum Sodhtolo…
Akrek Tujer Kelolo
UPKARACHEM OJJEM Gheun,
Sasnank Simiterint Tum Nidhtolo…


Boroupi: Cajetan Godinho (Majorda/Kuwait)
Email: joycaj@... http://groups.yahoo.com/group/gulf-goans/message/5776
http://www.goa-world.com/goa/tiatr/cajetansartwork.htm

Kuxealkaechi Zor


KUXEALKAECHI ZOR


Tum Zaum Assa Suria
Uzvadd Gharacho
Sobit Sundor
Putlo Koso Menamcho
Apurbai Tuji Kortat
Soglleamkuch Tum Mogacho

Tum Nam Tor
Gharak Sobai Assonam
Kitlem Sogot Asson
Kainch Assa Xem Disonam
Tuje Osle Girestkaek
Dusri Girestkai Sor Zaumchinam

Lhan Pun Porzollit
Uzvaddachi Tum Divli
Dusman Passun Kuxeal Zata
Distoch Tuji Savli
Ghorcheank Toxench Sezareank
Tum Ek Khellpachi Bavli

Ghov Anik Bail
Ragan Assot Tor
Tujem Hanstem Mukamol
Polloun Ghalta Visor
Xapai Xamaimchi Tum
Mhatarponar KUXEALKAECHI ZOR

Kazari Jivitant Ghov Bailechi
Tum Mogachi Nixhanni
Tuje Vinnem Kallok
Aiz Kitlech Gharanim
Donia Kurpen Uzvaddan Bor
Kalloki Ghorabe Bhurgeachea Kirnanim.


Boroupi: Cajetan Godinho (Majorda/Kuwait)
Email: joycaj at hotmail.com
http://www.goa-world.com/goa/tiatr/cajetansartwork.htm
http://www.goa-world.com

Tum Maka Mell'leleak


TUM MAKA MELL'LELEAK


Tum maka mell'leleak
Ratchi sarki nid nam
Toklen he fokot tujim
Hozaram vhoir chintnam
Koslo oso marla montor
Mogachea raterant ghatla bhitor

Tum maka mell'leleak
Fokot hanv tujench chint'tam
Disar sud'dam fokot tujinch
Mogachim sopnam gunt'tam
Goroz naka evunk nid
Tujer somorpilam mojem vid

Tum maka mell'leleak
Virgollun moji ghelea ruch
Tan bukh kainch kollonam
Kam korinam mozo buch'
Osso ekttoch amurkoch hanstam
Tuji ieadi gheun bostam

Tum maka mell'leleak
Soglench maka dista novem
Dixttan tum, sopnan tum
Sozmonam kitem korchem hanvem
Tokler boslam moga bhut
Kednam meittlem moga ambrut?


- Cypriano Fernandes (Riyadh, K.S.A.)
www.goa-world.com/goa/konkani/

Vatt Khupuch Lamb


Vatt Khupuch Lamb


Kallkhi rat
Ievchi asa
Khubxi vatt
Cholchi asa.

Kallkhi rat
Vechi asa
Cholpak survat
Korchi asa.

Mollob kalleantlean
Dislem tambddem-nillem
Ailem dekhun fantem
Rup suriachem prokaslem.

Chol’lom hanv
Suriachea unetan
Thoklom hanv.

Atam zali sanz
Mot mhoji zali vanz!
Mon sangta thamb, thamb...
Vatt khupuch lamb.

Torii chol’lom hanv
Sompounk ulil’li vatt
Punn tharlom hanv
Oskotaie ieun rat.

- Diogo Fernandes (Raia)
http://www.goa-world.com/goa/konkani/

NATALAM


NATALAM



Monant uprasleant novim kolponam
Pois keleant mellim chintnam
Dukh sogglem pois korun
Hanstim zaleant sogleanchim tondam


Sobit, sundar nettoileant ghoram
Gharant pettoileant chok chokit noketram
Ixtt, dusmanak daddun amontronam
Khallzant rigoileant novim bhavna.


Sanj sokall kednam vetam khonn zannam,
Disuim bor kam kortam lavn mona,
Monat handdun koxechim lahram
Ghorant Koxeal kain bhorleant bhurgim bhalla


Angak ghatleant novim angostram
Aicheam dissa konn konnak hansonam
Gorib, durbollank gharant haddun
Tondam godd keleant godd, godd mitthai diun

Aicheam dissak soggleanche hatik hat
Mogeam, zoddpam, mouzen sartat aichim rat
Sogott Pontteo, dengeo, gevn bettonk vetat
Zolmolam dekun aiz soddvondar gorvam gotteant.



- Mariano Lucas Diniz 25/12/2006
lucasdniz at hotmail.com

http://www.goa-world.com

Monantle Vinchar Mhoje


Monantle Vichar Mhoje

- Diogo Fernandes (Raia)


Omtan noxibachem map
Monant zalo motto poxchatap
Aili kuddik, dukin tap
Bosun kallzacher bhavnik xap
Kallzachi vaddli dhap,
Tonddak koxich suttlinam zap;

Sangtolo asa
Aikotolo nam,
Dekhun sangchem Soddlem!
Aikotolo asa
Sangtolo nam,
Zalear aikotolem kitem ?

Ditolo asa
Ghetolo nam
Mhonntoch divchem urlem !
Ghetolo asa
Ditolo nam
Tor ghetolom khoinchem !


http://www.goa-world.com/goa/konkani/

NIKAL




Nikal ( Result)


Vollkicho avaz pavlancho
Kuroikar ailo dislo mhaka
Veg-vegim dar ugoddtanam
Ek ostori bhurgea vangdda

"Tum hea porak vollkota?"
Zoglavnnem nastanam,
Goddgoddacho avaz
Kolejint nim'nem
Dis sortanam
Mosteaponnacho ailo nikal..............

Lino B. Dourado
(Utodd'dekar)

http://www.goa-world.com/goa/poems

HANV MONTRI ZALAM GHA



HANV MONTRI ZALAM GHA


Mhoje nove montrimonddolan asat cheallis subhagi
Nigtoch novo povitr prasad ghetla konnuch na papi
Daven-uzvean pollovpi nhoi, sarkech nitt rosto cholpi
Ponn kednai goroz podleruch meza pondchean hat korpi


Bizle montri tumkam kednach kallokant dovorchona
Air condition choloit ravat bizle meter voir sorchona
Vahutuk montri sardina baxen bosint tumkam bhorchona
Goddie tikeattichi dhor vhaddteli montreachea bolsak burak asona


Vikas montri teag kortolo xarantli borich udhorgot korpak
Goir kaidean imaroti ubheo, thodim flettam toiar montreak diupak
'Tourism' montri adtolo bailo 'tourist' hotelancho donddo vadovpak
Baina oslea sundoream kodlean AIDS pidda Goeant odik vistravpak


Bolaikea montri sambaltolo bolaiki Goemchea porjeachi
Sorkari hospittolant distelem gordi na piddestanchi
Ghor montri rakonn kortolo dor ek Goemchea kuttumbachi
Daram ugttinch dovrun nidat birant na choranchi


Krixi montri xetkamot korinastana borpur jevon ditlo
'Non-agricultural land' oslo xik'ko marun pikavol zomnir sudarop kortolo
Xikxonn montri Goemchi 'illiteracy' kobar korun jerul
ghetolo Thodeach mhoineant porot venchnnuko ani fuddlo sorkar xikop naslolo


Ani Hanv Mukhel Montri nit mhoji asteli ekdom kodok-kor
Mhojem ritem aidon asa koslei kamank etna tacher poili nodor dovor
Thodea zagea rikamea dovorleat,'Jumbo Cabinet' alpachea todir pavlo tor
Rockdeach montrimondoll zage choddoitat, iteak ami Ali Baba ani cheallis chor.

Lino B. Dourado
(Utord'dekar)
http://www.goa-world.com/goa/poems


Voili kovita Junh 2002 vorsan V. Ixtt
&
July-August 2002 'The Goan Review' masikar chappun ail'li

Dinar..... Dinar..... Dinar....!




Dinar..... Dinar..... Dinar....!


Ail'lom zoddunk
duddu dinar
Kuwait pavtoch
gomlo sonvsar
dogh-dogh uzo
koxtt marekar
xim kollkollo
kinnacho thar
jivache mhoje
zale bognar
chintun chintun
zalom bejar...
girest ganv
gorib hanv
dinar....dinar.....dinar

Zodduk dinar
axeun ailom
dis, mhoine
sukh sopnelom
vorsan voros
zoddit raulom
somnam sukhrar
mejit urlom
Ghorchim mhojea
vatt chukhlom...
dolle mhojea
voir mollbar
ghor mhojem
pois vattar
ken'na zatlem
rinn kabar
bolsam mhojim
poitat vatt
dinar.... dinar.... dinar

Bailo desh
vhoddlem sopon
adhurem jivit
koxtt nirfoll
anvddo asa
kallzan lipon
mhojench maka
ek vhoddponn
oddruxt koxtt
pollenam mon'n
hatant poixe
ek pixeponn
fattim fuddem
pollena konnn
jiv Kuwait
kalliz Goeam
kitem zoddlam
kaim nam
khoim ghel'lo
khoim nam
udok koxem
omtea kollxear
jivit ritem
axechem lhar....
dinar... dinar... dinar!


- Fr. Teo Fernandes (Kuwait)
www.goa-world.com

Ami soglle don... tonddache!


Ami soglle don... tonddache!


Gulab Romi, kantto nagri,
Ami soglle don!
Boroitat Romin, zhuztat nagrik,
Ami soglle don!
Romin mis, nagri mas,
Ami sogle don!
Sonvidan Romik, vichar nagri,
Ami soglle don!
Xikop Morattin, fuddari Konknnink,
Ami soglle don!
Sompadpi Konknnin, bhurgim xiktat Inglezin,
Ami soglle don!
Tonddar fulam, hathan suri,
Ami soglle don!
Ganvant Konknno, ghorant bamonn,
Ami soglle don!
Ulovpak fuddem, zogoddpak fattim,
Ami soglle don!
Fuddlean bhandari, fattlean fuddari,
Ami soglle don!
Far goribacher, bhar grestacher,
Ami soglle don!
Melo bhattkar, gelo rendkar,
Ami soglle don!
Gaunkari porkeank, gaunkar porki,
Ami soglle don!
Xetam ghorank, ani ghoram agrant,
Ami soglle don!
Veller disco, ghoramni buddti,
Ami soglle don!
Bolsant poixe, kallzan poke,
Ami soglle don!
Ek prodex, don bhaso,
Ami soglle don!
Ek bhurgem, don lipio oprent,
Ami soglle don!
Atam ami zanvuia ek!


(Bab Cyril Fernandesan Azad Moidonar Dezembrache 18ver, 2006,
mhunttlele kovitentlean suchlam)

(GOENCHO ULO/Ank Janvier 2007)