AMBO

Ambo



Hatant ghetlo ambo
Mov zai-sor chiddoilo

Ambechea dhenta vatten
Barik burak kelo
Boroch pikil’lo ambo
Chiddit-mudd’ dit chivnlo



Ambeacho ros chaktanam
Hata velean vhavnlo
Jib mhoji bhair kaddit
Hatar vhavntolo ros levnlo


Lino B. Dourado
(Utodd’dekar)
http://www.goa-world.com/goa/poems

27/3/2008

Vikalim Vogddam

Scarlet Eden Keeling hem Brittix nagrik cheddvachem moddem, Anjuna dorya veller Fevrerache 18ver fantea parar mell’lem. Avoy vangdda, Gõyant bhonvddeakar mhunn ail’lem. Vikallea vongddanchem (narcotic) pixem tika aslem khoim. Ho faido, kuddik bhukelelea mon’xanim ghet’lo ani ticher mornn ailem. Oxech toren, her inosent bhurgeancher hol’lo (attack) zala ani zata . Punn choddxe te lipoun dovortat. Sokoll asleli mhageli lhanxi kovita, Scarlet-ak ani dharun mornnank boli poddlelea inosent bhurgeam khatir bhettoitam.



Vikalim Vogddam

Tuffanik vadollan
Vogddam vikalim
Tourism-achea nanvan
Mornam bhurgeanchim

Gõyche kinarer
Cocaine-Ecstasy
Ti khavunk
Tourist-ancheo raxi

Tornattim gulam
Nistur drugs-ank
Kuddik axeleleanchea
Sampoddat ghansank.

Inosent bhurgeank
Jiyeunk diat
Tornno fuddar
Vibaddi nakat

Lino B. Dourado
(Utodd’dekar)
http://www.goa-world.com/goa/poems
21/3/2008

Novo Jiv

NOVO JIV




Sanjecho vell zala
Ani bhair kallok poddla
Volter-ar boson zaitem dixtti poddta....
Zhaddam, nokhetram ani sogllem jem ghoddta
Mhaka dixtti poddtta. Punn hanv pollena....
Mhojem mon thoim bilkul vochona.

Chintna bhonvtat mhoje motint
Bhair tanka ghalunk kotthin
Bako ietat te bhaxen chintnam
Bejar kortat, ani mhaka soddina
Angachi khoroz tori bori.....
Hi sankholl mhojer Deva, kiteak ghatli?


Aim lok mhonnttalet, ho fatra bhaxen nibor
Atam hanstat - to zala sarko gobor
Mhoje churchure kortat
"Baba, sodd tea chintnnachi vatt
Kitem melltta tujka oxem korun?
Oddik borem kiteim kam' hatin dovrunk....


Matharponn ailem mhunnttokoch
Jivak na bilkul ruch
Adel bhaxen ghottai na,
Rogot mhojem nivlam
Kainch korum xem disona
Fokot dolle dhampun volterar bostana
Chintop ieta hi rat kobar zateli
Vo sasnachi sasnak urteli?


Suskar soddun tuzo ugddas kortam
Dorieache lharam bhaxen ietat tim chintnam
Bilkul pixi zalea mhoji tokli
Hanv zannam hi vatt bori nhoi
Saiba magtam dusro marog dakhoi
Zaitem hanvem hea sonvsarant sonslem
Azun pasun mhaka dadosponn favo na?


Him mhojim chintnam, aiz kal, mhojea mogall
Kortam tuzo ugddas rat, dis ani sokall
Opekxitam kallzant than ki zo mog ami kelolo
Atam mhaka novo jiv ditolo......


- Placido D'Souza (Pune)


{GRAF-an ghoddun haddil'le boroupam spordhent tisrea zagear
ail'li hi kovita}.


The Goan Review / May-June 2001

Maincho Xirap

MIANCHO XIRAP



Maim, maim tum mhoji
Samball'llo mhaka tujea kusveant
Maim tum mhoji
Haddlo tunvem mhaka hea sonvsarant


Maim tum mhoji,
vaddla hanv tujea dudhan
Maim tum mhoji,
khell'lam hanv tujea gopant

Hanv sonvsarant ietana
Bhogle tunvem zaite khoxtt
Mhaka vhodd korun, apunn upaxim ravon
Bhorlem mhojem pott.

Xikoilo tunvem mhaka, vavron dis ani rat
Maim tum mhoji, tunch mhozo dhorm, Dev ani bhavath.

Zaite amche bhav asat amchea modem
Je nokllot aple maincho valor
Aple maink dukhoitat, zal'lea porim ti ek chakorn
Visortat te soglle, amche pasot main
keleat te teag
Sonvsarantle dis tum khuxal sartoloi tor
Ghenakai maincho xirap.


- Paul B. D'Souza (Bahrain)

(The Goan Review/ May-June 2001)

Konknni Kovita - B.E. Mendes

KONKNNI KOVITA




Soglech zaun asat bhag
Vorixtt vichar attpona tosle
Tanchem xarir, mhollear, soimb
Ani atomo tancho Parbrham


Anik kitem zai tuka, sang?
Niall'lear kallzak tejistkai
Osliv kovita, mhollear
Mogan svargachi vatt.

Jogant jivitanuch tum tujea
Ojeapanchi ek roinn
Vichar niallunk boslear
Axirvadik xrungar

Monis nhoi ek xarir
Tem tachem ek vahan
Motintlean tacho vichar
Muktvont soglleam samkhar.


Tedna io tum mhojea fattlean
Ghevn chintnancho thav
Hanv uzoll zau porian
Thir niallun rav.

Konknni bhas amchi
Povitrancho surngar
Mellom sodinch tuka
Mhojea kurpecho adhar.


- B.E. Mendes
Tivim, Goem


(The Goan Review / May-June 2001)

Bhorvonso

BHORVONSO



Dhortechea puta tuka
Sotam dakhoitam
Dhortechea puta tuka
Roddonk xikoitam


Bhagarachea boxient
Dukam dakhoitam
romichea kambollint
chambddim dakhoitam


Terezachea pakea bhitor
Moddim dakhoitam
rosmachea vistidant
Kidde dakhoitam


Dhortechea puta tuka
Sotam dakhoitam
Dhortechea puta tuka
Honsonk xikoitam


Futtlelea mittulant
Moteam dakhoitam
Pinzlele volibhitor
Anjeak dakhoitam.

Dhortechea puta tuka
Sotam daihoitam
Dhortechea puta tuka
Nachonk xikoitam.


- George Pinto (Mongllur)

GRAF-an ghoddu haddil'le borovpam spordhent
poilea zagear ail'li hi kovita

Source: The Goan Review / May-June 2001

Sang Maka

Sang Mhaka



Monis dhanv dhanvta
Sokoll poddleleak hat di nastanam
Zhorichem udok ghosghoxeanim vhanvta
Punn tan lagleleak pieunk mellonam

Monis duddu zomoita
Goribache tokler ube ravun
Somdirachea pottant nistem posta
Girest monis durbollank khatta pillun

Sogllea patkeanchi soddvonn khorcheak
Jezu Tuka khursar khillailo
Eksarkelea monis zat zavunk zai asli
Mon’xam modim veglozar koso zalo?

Lino B. Dourado
(Utodd’dekar)


Lapitt

12/3/2008