Mhojem Valentine

Mhojem Valentine
(VALETINE DAY POEM)


F ultelea moga fullak
E vkar divncheak
B hitorle kallzak
R om’pieo ful’leat
E k-ek pakllicher
R up tichem chitrailam.


C hukli kai ti vatt?
H usko vhaddot veta
O rdo dis sompla
U gddas bhouch ieta
D havun ievnchem tinnem
A xelelem kalliz tikach ravtta.

T ichea sangatak
A mrutacho sonvsar
R osroxit kortana
I nglle mogan zoloitam, ani
K horea mogak jivit ditam.


Tujo Valentine

Lino B. Dourado
(Utodd’dekar-Q8)
www.goa-world.com/poems/

TALLNNI

TALLNNI


Mukhar kallki vatt asa
Xiddkail’li tika bhitor sorum naka
Paim chukun fatrak apttat
Uprant zal’lea gaieak roddum naka

Chondracho uzvadd kupani liptoch
Fuddem vochunk ghatlim panvlam
Tichea dolleani mog dixttoch
Ratchea ranink ful’li fulam.

Tiche hat mhojea golleak xirkovtana
Mogachi zhorik futtle nizhor
Amrut onth onthar apttotana
Ghamechea thembeamni borle vagor.

Nodrek nodor mevlli tedna
Tinnem lojun dhample dolle
Eka mekhacho svas ghetna
Nazuk kuddiche sandde ustovle.

Khoxechea somdirant uddki getoch
Sontosachea voikuttant pavunk tollmolim
Urbechea lharamcher pevun zatoch
Uzvaddachea kirnnank lojunk laglim.


Lino B. Dourado
(Utodd'dekar-Q8)
www.goa-world.com/poems/

Nimnno Ievkar?

Nimnno Ievkar?


Ieat babu ieat dhexi tourist mama,
Goa tumkam un-unit ievkar dita
Tumchea Rajeant choddxo sovai na
Itlo hangasor soro mellta.

Konnem tori mahiti dilea
Goenchea kinnarer mouz, mouza
Tornneo ostoreo gareo katicheo
Dove renver nagdeo nidhta.

Goenchea cheddvamchim mottvim nhessnam
Tumchea Rajeant fokot lamb gagre nhesstat
Vidhexi tourist bikini-n, ugttim zangddam
Tem pollevnk tumche dolle axettat.

Goenchea fenniechea poilea ghonttar
Umedhin dorieant udki ghetat
Mouzen nachttana soreachea nadar
Uchamboll lharam somdirant vhortat.

Dusrea disa Goenchea disalear
Dhexi chear tourist buddhun mele
Sumar naslele kumar moujek ail'le
Sovnsarak bye-bye korun gele......



- Lino B. Dourado (Utodd'ddekar)
www.goa-world.com/goa/poems

http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado

TUM MAKA MELL'LELEAK

TUM MAKA MELL'LELEAK


Tum maka mell'leleak
Ratchi sarki nid nam
Toklen he fokot tujim
Hozaram vhoir chintnam
Koslo oso marla montor
Mogachea raterant ghatla bhitor

Tum maka mell'leleak
Fokot hanv tujench chint'tam
Disar sud'dam fokot tujinch
Mogachim sopnam gunt'tam
Goroz naka evunk nid
Tujer somorpilam mojem vid

Tum maka mell'leleak
Virgollun moji ghelea ruch
Tan bukh kainch kollonam
Kam korinam mozo buch'
Osso ekttoch amurkoch hanstam
Tuji ieadi gheun bostam

Tum maka mell'leleak
Soglench maka dista novem
Dixttan tum, sopnan tum
Sozmonam kitem korchem hanvem
Tokler boslam moga bhut
Kednam meittlem moga ambrut?


- Cypriano Fernandes (Riyadh, K.S.A.)
www.goa-world.com/goa/konkani/

Maim Bhas KONKANI

MAIM BHAS KONKANI


Sobit ‘KONKANI’ mojem nanv
Mannkulem Goyem, zolmancho mozo ganv
Vaddlim hanv, khavun Goencho paum
Astig put-dhuvo asson, aiz lhanvikai bhogtam hanv

‘Sirvidoranchi bhas’ mhunnon, chepun mhaka dovorli
Bonkonddint xevttunk nam, punn kuznant xevttili
Kuzner-bottleranim, khupuch xeva moji keli
Aiz tankanch lagon, jivi hanv uronk pavli

Vhodda dhobajean, serkari manvotai dili ani choddoili panvddear
Ani titlean sanddli mhaka alaxirea vinn, umkollonk varear
Konnuch tozvit korinant, ghalunk modd’ttem ghor tharear
Voilean khebaddamn mojim kortat, socegad bosson mhollear

Hathak dhorun voron, dakoile iskolache panvdde
Dhadoxi zavn, givlle hanvem khuxealkaieche anvdde
Bulovnk mhaka, mathear mojea tambdde gulab mavlle
Chintlelim chintnam zaleant sopnam, noxibar bosleat kanvlle

Thodde pachartat mhunnon mhaka ‘Oh mojea mogache maim’
Mhunntat te: ‘Tunch amchi boddai, mogan bhorleli bhaim’
‘Noxib amchem, tujea osli mellonk amkam maim’
Punn koslo faido re puta-dhuvanim, tumchea hathanim ghoddonam kaim

Vaddoile hanvem tumkam, ximpovn mojea hord’deachea dudan
Khell’lloile hanvem tumkam, bosovn mojea avoiponnanchea gopan
Khavoilem hanvem tumkam, mogan sizoilelem nachineanchem tizan
Punn itleim korun kainch faido nam, jivit dista luskan

Puta-dhuvanim, tuminch mozo dhir-adhar, bhavart-bhorvanso ani alaxiro
Tumche mozoti vinnem sonvsar ho koddu, chintlear suddta xirxiro
Zoxe porim varear ubo ravon, nisteak zompoi marta kirkiro
Tosoch dusman toiear zala, bhazunk mhaka hathan ghevun murmuro

Xekddeanchi rompi hanv, pinnkeanim moi-mogan ximpovn voir kadleli
Hanv nhoi ‘bhas’ sezarchi magon haddleli, vo dhaddavn pikoileli
Okman mhaka bhogta, lokan pachartoch ki hanv ‘bhas mhunn vatt sandleli’
Zolom ghetannam ‘maim patlean maim’ mhunn tumi mhaka vakanddleli

Hanv nhoi maim fokot Kristanvanchi, Konknneanchi vo Musolmananchi
Sogott zonn ekuch mhaka, hanv maim tumchi soglleanchi
Katrunk dinakat tenexi moji, hanv bhas tumchea purvozanchi
Dhonia Deva, sodankal pettovn dovor divli mojea jivitachi

Hath zoddun upkar magtam, moje korinakat vantte
Gorje vinnem, rostear ximpddainakat kantte
Hathak-hath divun ekvott zoddat, bhurge toxech zantte
Oxench kelear ki, pois zavnk pavtele tumche tontte

Uttat re mojea puta-dhuvanim, kiteak azun niden bhormetat
Osoktai moji vaddon, kuddintlim haddam bhitorlea bhitor kosmetat
Hanv zannam, sogott tumi mojem boreponn pollevnk ontregtat
Tor kiteak re puta-dhuvanim, mozo upeog korunk tumi pattim sortat

Ak’kea mojea jivitan, kainch tumkam hanvem korunk nam komi
Vell pavlo puta-dhuvanim, zagruttai korun xidduk zavnk tumi
Aichean zanvdi tumchem ekuch magnnem ‘Amkam zai Konknni borovp Romi’
Ekvottan ravlear, jerul adhikari bodoltelet “Act” vachunk: ‘Konknni,
Devnagri ani Romi’

Aiz sogott mozo kuttumb, vhodde umedin monoitat ‘Sonvsari Goyem Dis’
He kovita barabor, zonn ekleak pattovn ditam maie-mogacho ‘kiss’
Koxtt moje nirfoll zavnk divnakat, korunk poddlear passun sacrifis
Dolleani tel ghalun ravtam, pollevnk kednam udetolo to ‘ROMI Konknnicho
Dis’!

Tumchi mogall maim bhas,
Konkani

K A B A R

Ho put tuzo, Saudichea oronneant ravon golloita dukam
Kainch tachean hanga ravon korunk zainam mhunn ghe maim tukam
Aiz zorui tor, suknnea porim aslim mhaka pakam
Uddon ievun, pustolom aslom ghe maim tujim dukam

Lamb jie Konkani!

Moi-mogan,
Domnic Fernandes
Anjuna/Dhahran, KSA
http://www.goa-world.com/goa/konkani/introduction.htm

TUZO UGDDAS

TUZO UGDDAS


Doria Kinarek Ravon
Lharam Mezunk,
Tozvit Keli…
Auchit Monant
Tujea Ugddassachem,
Lhar Uprassun…
Mezlolo Ankdo
Mhojea Monantuch,
Buddon Ghelo…


Zonnelar Bosson
Ratchi Molbar,
Nodor Marun…
Diamanti Sarkim
Chokchokit Noketram,
Monant Gunttanam…
Tujea Ugddassachem Noketr
Monant Chokchokun,
Guntleli Dori Tuntli…
Sopnant Sorgimche


Panvdde Chodtanam,
Dolleam Mukar…
Tuzo Rupkar Eun
Sorgar Tan Nisrun,
Sounsarant Xhevtolom…
Mogan Tujea Piso Zalam
Chovis Voram Sintid Tharear Nam,
TUZO UGDDAS Mhaka Sottaita…


- Cajetan Godinho

KAL ANINK AIZ - KITLO FOROK

KAL ANINK AIZ - KITLO FOROK


Kal tum aslo toso
Kalcho tum aiz disnam oso
Kalche bhari vichar tuje
Ratiam bhitor bodol'le koxe
Kal aink aiz kitlo forok
Chintam chintam guspotam
Kalcheo ieadi uspotam

Kalchi tuji dukh-bori gozal
Disli Pankaj Udhasachi ghazal
Pun aichem tujem vonttavelem ghit
Dislem A.R. Rehmanachem songit
Kal aink aiz kitlo forok
Chintam chintam guspotam
Kalcheo ieadi uspotam

Kalchem tujem chintest muk'k
Zahir kori tujer ail'lem dukh
Zoxem girann sompta lagun chondrak
Chintnachem tufan diso tujea bondrak
Kal aink aiz kitlo forok
Chintam chintam guspotam
Kalcheo ieadi uspotam

Kalcho xeanticho parvo to
Aiz zaunk paula ghatmaro
Torsad, bonduk gheun hatan
Chor todd'ddoki luttero
Kal aink aiz kitlo forok
Chintam chintam guspotam
Kalcheo ieadi uspotam

Kalchem kallem cholchitr tem
Aiz rongit uzvaddan ail'lem porddear
Kalcho thondd sobhavacho mitr mozo
Aiz dadagiri korta hat marun horddear
Kal aink aiz kitlo forok
Chintam chintam guspotam
Kalcheo ieadi uspotam.


- Cypriano Fernandes (Riyadh, K.S.A.)
http://www.goa-world.com/goa/konkani/

KHONNEM SODLA?

KHONNEM SODLA?



Jinn munxeachim mhunntlear ek zalli
Okosmat jinnetlem sukh zata khali
Loton, danvon jinnet eta vaitt palli
Toruim astanam chant marta fuddlim.

Amcheam jinnecho rong tor veg vegllo
Khonn zanna? Jinnet kednam marit varo koslo!
Cholon, cholon toktam toruim haves vodlo
Chinta uzvadda adi tandunk porvot joitacho

Jinnechem sat somdhir khol sagorant
Sogllem buchkovtat vadoll hunvorant
Vegim vegim todir pavonk opekxa monat
Ponn! Upaim nam renvodleat orixtt lahrant.

Auchit xantikaicheam molleant odchonek sampodle
Harovn, hanga thoim sukhak sodunk dhanvlem
Churchurem devan aikon sogleank mukhti kelem
Ponn kiteak upkarlem! Soglem motlobi zolmolem.

Sogleank amkam axeam ap suvartachim
Jivit voir khala zatam eun jinnet sukhti bhorti
Kednaim ponn, iad keleam fattleam jivitachim?
Soglem visron gelem ratr kobar zatoch moujechim.

Koxttan zaitem komoilem ponn, tem khoim asa?
Kitleim sukh boglem toruim astanam xanti nam
Harloleam jinnet chinta jien ani kosloch faido nam
Ponn, toruim astanam jiechem khonnem sodlam?..


- Mariano Lucas Diniz
http://www.goa-world.com Team Member

Bhagintlem Ek Ful

BHAGINTLEM EK FUL


Gulabachem Ful Diun
Cheddo Chedvak,
Mog Assa Mhunon Dakoita…


Satvo Sacrament Zoddunk Vetanam
Kazarachem Motor,
Sobit Fulamnim Nettoita…

Dhedo Kiss Diun
Hattant Fulamcho Turo Ditoch,
Nourea Sangatak Vokol Altarar Chodta….

Ixtt Anik Soirim Porbim Diunk
Fulamche Ture Dhadun,
Ghor Ani Mattou Fulamnim Bhorta…

Bhurguem Zolmant Etoch
Vo Konnuim Duent Aslear,
Fulamche Ture Gheun Bhett Ditat…

Zolmanchea Disak Fulam Diun
Lagsurlim Anik Poisurlim,
Happy Birthday Mhuntat…


Jivit Somptoch
Mornamcho Kassianv Passun,
Fulamnim Bhortat…

Matiek Laitanam
Fulam Xhevtun,
Ixtt Soirim Adeus Kortat…

Mornamchea Disacho Ugddas Korunk
Meleleamcho Fond,
Sobit Fulamnim Nettoitat…

Jivitant Dhadospon Meutoch
Devak Argam Ditat,
Ghalun Fulamche Har…

Dusmanank Fulamche Ture Diun
Amchea Dessant Anik Gharant,
Ditat Boro Evkar…

Hea Natalank
Anik Novea Vorsak,
Tujea Jivitant Nodor Tum Mar…

Kallzantle BHAGINTLEM EK FUL Kaddun
Khuxealborit Natalam
Anik Sontosborit Novem Voros Mhunon
Dusmanank Uggod Tujem Kallzachem Dhar…


- Cajetan Godinho

Cajetan's Godinho's Collection of Konkani Poems

http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=cajetan+godinho+%2B+Konkani+Kovita

Upkarachem Ojjem
Abrilache 1ler Eka Vorsa
Tujea Putachea Nanvan
Tum Soggleamchi Girestkai
Kuxealkaechi Zor
World Tour (Sounsarik Boundi)
Dusro Soeag (Second Chance)
Dhadosponn.
Ghineannamcho Divo
Tuzo Ugddas

Zap Mellot ?

Zap Mellot?



Ixttagottichea margar
Bhorvonxeachim kirnnam
Pollounk axelolo
Dusmankaeche kallokan
Vochun ga
Koso xennlo?

Boreaponnachea umbrear
Panvol dovortana
Paianchea tollak
Niddukaichi dhull
Chittkon urlea
Ti khoxi
Zhaddun uddoitolo?

Tujea ontorskonn-an
Ghanneari vostum’ni
Ghontter kela
Zalear tum
Xegunni khornneank
Zago khuimcho
Samballun dovortolo?

Tuje dolle
Nitollsan pollena
Oxem tor
Tuje kan
Sot aikotele
Dista tuka?

Lino B. Dourado
(Utodd'dekar)

Bail, Ghov ani Khuris

Bail, Ghov ani Khuris



Poilim, Nim’nno Sukrar
Uprant Paskancho Aitar.
Khuris bharadik
Ani voznadik
Dekhun mukutt
Porzollit zhogzhogit.

Mhozo fuglelo igo
Mollbar pavla
Bailecho jiv legun
Hanvem kobar kela.

1966 vorsa thavn
Hanvem voznadik
Khuris ubarla.
Atam, mhozo hat
Itlo ghott zala
Pondra kilancho sak
Kal legun, hanvem
Ekach hatan ubarla.

Mhojea igochea voznan
Bail babddi
Sarki chepon urlea.
Sonsun-sonsun
Deva nodren
Mollbar pavlea
Zait ghoddie
“Santinn” zalea.

Voznadik khuris ghevn
Hanv soglle kodden bhonvtam
Pondra kilanchem vozon
Mhapxeam Bazarant
Ekach hatan ubartam
Ani bailechea motorant
Haddun dovortam.


- Romeo Almeida

Bhavponnache Ful

Bhavponnache Ful



Vachunk boslom zhadda ponddak
Monant aili ek kolponam
Saulli ghaltat rukhachim panam,
pollenastana bostoleanchim borim vaitt monam.

Zoddoitat pavs pavsachim kupam,
Zanv Hindu vo Musolmanam
Pollenant suryachim kirnnam,
Tumchim borim vaitt monam.

Ail’lim jedna Tsunamichim lharam,
polleunk nant godiallachim voram,
vinchunk nant Hindu vo Kristanvanchim ghoram,
Ibaddli soglea dhormanchim meram.

Adle bandil’le te pul,
Punn okosmat koxi pettli ti chul.
Bhavponnachem ful’lelem ful,
Morunk pavlam sukun tachem mull.

- Gosly Fernandes.

ZOKOM

ZOKOM



Tum etlem mhonn ghorak marli sarnn
Tujea pavllamcho avaz ailoch na
Sokal vochun sanj aili
Savlli pasun tuji zolkoli na


Rat zali pettle dive
Dongra sokol rodle kole
Ratche ranink full’lea kolle
Tuji vatt pollovn voule dolle


Iad khorit mezlim noketram
Khuim chucklem kai gonnit?
Goddialiche dhanvte kantte pollovn
Khallki ratrilean dislem tujem chitr.


Ghele vorsa mhoje zolm disa
Tum lojun kasova(1) baxen cholovn ailem
Aiz ek voros sompta thuinch asa
Konnintle(2) vhaumtea udka baxen vhavun ghelem



Lino B. Dourado
(Utord’dekar Kuwait) 1) tortoise 2) valley

Ami soglle don... tonddache!

Ami soglle don... tonddache!

Gulab Romi, kantto nagri,
Ami soglle don!
Boroitat Romin, zhuztat nagrik,
Ami soglle don!
Romin mis, nagri mas,
Ami sogle don!
Sonvidan Romik, vichar nagri,
Ami soglle don!
Xikop Morattin, fuddari Konknnink,
Ami soglle don!
Sompadpi Konknnin, bhurgim xiktat Inglezin,
Ami soglle don!
Tonddar fulam, hathan suri,
Ami soglle don!
Ganvant Konknno, ghorant bamonn,
Ami soglle don!
Ulovpak fuddem, zogoddpak fattim,
Ami soglle don!
Fuddlean bhandari, fattlean fuddari,
Ami soglle don!
Far goribacher, bhar grestacher,
Ami soglle don!
Melo bhattkar, gelo rendkar,
Ami soglle don!
Gaunkari porkeank, gaunkar porki,
Ami soglle don!
Xetam ghorank, ani ghoram agrant,
Ami soglle don!
Veller disco, ghoramni buddti,
Ami soglle don!
Bolsant poixe, kallzan poke,
Ami soglle don!
Ek prodex, don bhaso,
Ami soglle don!
Ek bhurgem, don lipio oprent,
Ami soglle don!
Atam ami zanvuia ek!


(Bab Cyril Fernandesan Azad Moidonar Dezembrache 18ver, 2006,
mhunttlele kovitentlean suchlam)

(GOENCHO ULO/Ank Janvier 2007)

Nid'dukai ?

Nid'dukai ?
Fonavelean tuvem
Bharot Kriket jiklo mhonn
Tuzo anond porgottailo

Punn tea disa
Mhozo sotkar zal'lo

Mhojea borea vavrak
Puroskar bhettoilo

Mhojem joi, joi korun
Porbim divnk
Tum sapuch visorlo!!


- Lino B. Dourado

Maim

MAIM

Maim tum asli tednam
Valor tuzo koulo nam
Vaddon manaim zatam zatam
Vollkunk tuka paulo nam
Mogan utor sanglem zalear
Borea monar ghetlem nam
Kitem oxem kelem anvem
Kiteak tuka vollkolonam?

Kopdde moje dhuvun pillun
Fer marun kori chak
Butt moje polish korun
Dovortali ttaka ttak
Rajkunvra bhaxen vaddoitali
Fokot mhunnoi naum aplem rak
Kikont korun kuxin ghatli
Kaplem anvem tujem nak

Boreak kiteim sangot zalear
Fur'r korun portem ditalom
Khorchak kiteim magot zalear
Gharantlo bhair soron vetalom
Vochon barrant ixttam sangata
Moujen rum whisky pietalom
Sanglelem utor khala uddoun
Patkan jivit jietalom

Pondra vorsanim ugddas ailo aiz
Maim tujea utrancho
Mhunnoi baba axetoloi
Chakonk mog avoicho
Punn tednam aum hanga aschinam
Sambhall korunk mojea putacho
Kiteak puta choltai tum
Rosto ho odruxttacho?

Kednam mevot, khuimsor mevot
Meulear portun zogddim korchonam
Pon'nas maglear xembor ditolom
Portun anink gheumchonam
Mogache zorin navoitolom,
Kainch vaitt zaunk dhiumchonam
Ekuch mogan ulo mar Maim
Dusreangher bhikek dhaddchonam

Pun him utram mojim aikonk atam
Kotta! hanga anink assa konn?
Adleo ieadi moje maimcheo
Eun niraxi zata mon
Logn zaun bapui zalom
Kitli khuxealkai, dhadospon
Pun mojeai putan makai oxench
Kelear bonvonk ganvant maka asot tonn?

Cypriano Fernandes (Riyadh, KSA)

MIRGH

MIRGH


Khor taplolem dhortorer
Kitleach divsanim podlo pavss
Podon hor rong birongi fulzaddancher
Mhugn zaun dhortoren sodlo jinne svass.

Aiz kitleach divsanim nillem molob
Ut'uteanim zalem sarkem abhall
Vaream netan marun ubhall
Suriar ailim kalleam kupam mall.

Sogleam vattanim podli doddok
Udkam tembe podon ful'lem sallok
Kirnacher danvon ailim saullim
Umedin boron ghor bhandi mavlli.

Kiddeanchim chinv chivat suru zalim
Khallokant pet'leo kazuleanchi divlli
Xeta merer udon bebo nachtalo
Rukha golint ravon roddo kovasil'lo

Zordar varo, doriam uchamboll zalo
Orixtt lahra, deger gosgoss podlo
Moda netan kosachim ailim dunvrim
Khina bitor survat zalim mirgachim.

Godd godda avaz kell suru ata kupancho
Kupam sangatak chock chok zoglancho
Mirgachi vatt xetkari veakulen pollet axi'lo
Mirgh suru zatach xetan rov marunk laglo.


- Mariano Lucas Diniz
Palolem/Canacona/Kuwait
www.goa-world.com/goa/konkani
www.goa-world.com www.colaco.net

Omrut Utsova Somoiar

Omrut Utsova somoiar

Vavraddeanchea Ixttachem Stutgit
Dp.:Potr amchem, vavraddianchem,
Potr amchem, Gõykaranchem,
Soglleanchea ekvottachem,
Devachem dennem vortem!

1. Seva keli IXTTAN
bhavponnachea mogan,
koxtti jivit jieun,
bollixttanchea dhiran!

2. Uzvaddailim monam,
hurben bhôrlim kallzam,
sakxi dili Sotak,
govai dili Mogak.

3. Khobrô amchea ganvcheô,
batmiô sonvsaracheô,
soglleank zagrut korunk
lokak vachunk dileô.

4. Gõychem nanvrup samball’n,
Konknni bhaxek ubar’n,
Gõychi rakhli grestkai,
eklich êk osmitai.

5. Vavraddianchea Ixtta,
Vavraddianchea Bhava,.
sogtta pasot Tuka,
Jezu, dhin’vas mhoima!

- Vasco do Rego s.j.

Lok Protinidhi Hanv

LOK PROTINIDHI HANV



Lok protinidhi hanv
Ekuch mhojem sopon
Vhodd zanv
Mhojea ganvchem nanv!
Makodd zavchonam

Svartha khatir
Eka pokxantlean
Dusrea pokxant
Udki marchonam
Mhoje gaddiechea mathear

Tambddo divo naslear
Porva nam
Porva nam
Vavurtolom rat-dis
Mhojea ganva khatir
Dor-ek khinn

Zoroun mhoji jinn
Mhojea ganvchea vikasachi
Ani udorgotichi kanni
Bhangrachea okxoramnim
Borovn dovortolom hanv

Itihasachea panamnim
Lok protinidhi hanv
Ekuch mhojem sopon
Vhodd zanv
Mhojea ganvchem nanv!


- Walter Menezes,Kepem.

Goychim Pixim Dulpodam

Gõychim Pixim Dulpodam


Yo re, yo re pavsa
Tuka ditam rupia
Pavs ailo motto
Rupia zalo khotto

Yo re, yo re Montrea
Tuka ditam ek kotti rupia
Montri zala motto
Rupia zala khotto

Montrii zala khotto
Choi re Gõykara
Choi re Gõykara
Ghosgoxeamnim pavs aila

Tum bhizum naka
Bhair soronaka
Tugelo montri legun nhidla
Gõykar nhidla
Montri nhidla

Amgelem Gõy choloupak
Nigap’pa Bellganv thaun aila
Gõyam aila atam Ponnje pavla
Toch amkam mhonnta
HANV GOYKAR..ani tum konn gha?!.


- Romeo Almeida