Omôr Konknni Kovi – MANOHAR-RAI SARDESSAI

Omôr Konknni Kovi – MANOHAR-RAI SARDESSAI
[Dhin'vaxi monacho ugddas]

1. Kovi-anjancheam paktteanr
uddun gelo az sorgar
Gõycho kovi Manohar !

2. Deva-doien favlolo,
Savoi-Veream zolmolo
ho Gõykar kovi-bhurgo !

3. Devan Gõykarank dilo
vividh gunnancho tthevo:
Gõycho obhiman vaddlo.

4. Kullin to êk Sardessai,
koviam modem khoro Rai:
sogllo Konknni lôk govai !

5. Pavsalleant futt'tat zhori,
unhalleant sukhtat nodi,
tachi zhôr sodam vhanvti.

6. Zaiteô bhasô ulovpi,
Avoi-bhas amchi Konknni
bhurgeabhoktin ballgili !

7. Pordesant jednam ravlo,
kitlo husko dakhoilo
aplê Avoibhaxecho !

8. Sobit sundor Gõy amchem:
Koviak sobit Gõy sogllem,
kuskeponn mat ghanniarem !

9. Nhoich amchim bhurgim fulam,
zomnintli mati sud'dam,
umallean haddtat dukam !
Ponnji, 24-06-2006

10. Nodi xetam zongolam
dhanvtam piktam doltanam
Mha-Koviak gaitat gitam.

11. Hindu-Kristanv-Moirancho
sodam hanstea tonddacho
Manohar ixttu khoro.

12. Monis ugtea monacho,
soglleank lagim ghetalo:
mon'xallaien vagtalo.

13. Monis nitoll chintnancho,
godd-godd rosall utrancho,
dulôb kulin chalicho.

14. Gõy, ganv aplo supul'lo,
pordesant nam visorlo:
odikuch hurben pettlo.

15. Gõychi vixêx Osmitai,
Gõychi soglli girestkai,
rakhunk kitli utsuktai !

16. Gõykarponn tarunk zhuzlo,
fuddakar tannem ghetlo,
tornnatteank uzvadd zalo !

17. Gõy hem amchem mannkulem
dusrea raxttran nam gillchem:
umedik Zoitu gavlem !

18. Bhosmun geli kudd tachi,
Gõykar monant togtoli
Koviachi omôr smruti !

- Vasco do Rego s.j .