BOROITA TEM MAT PATOK......
Ukhol’lem pen, laglo borounk.
Magir boroupa fattlo hetu nhoi mhonn ud’dexui nam.
Nam moriadichem bhann, nam moriadichi loz-pez. Kitem boroilem?
Kiteim tori boroilem!!! Magir tem burxem boroup zalem mhonn kitem zalem?
Omkea duensak omkem okhod dinvchem, toxem burxea boroupa borobor boupean vachpeank patkacho ul’lekh korun diuncho, ani aple zababdarentlean mukt zalo mhonn somzop chukichem.
Patka vixim ontor korpa itli budh samanea mon’xak asta.
Taka tache vixim zanniv korun diupachi goroz asonam. Punn hem zalem samanea mon’xachem. Zalear, apli budh ghannak dovorleleachem kitem? Tachea gineanar uzvadda ghalpacho konnem? Ani koso?
Sogllea vellar ami osleank porxim sangonk xokonanv, tedna boroup korun ani amcho nirop vachpeam meren pavouk xoktanv. Mhozo nirop hanv “boroupa” vixim boroun vachpeam meren pavounk sodhtam - odik korun “borounk zai mhonn boroitat’ tanche meren.
“Boroup” mhonnlem ki ukhol’lem pen laglo borounk mhonnllear zaina. Ani, ukhol’lem pen laglo borounk mhonnlear boroupi-i zaina. Punn boroupi koso zaupacho hacher boroupacho mhozo aiz hetu nam. Punn, boroup koxem aschem hacher mhojem mot hanv mandunk sodhtam. Jibek asa titlich dhar pen-ak asa. Jib jitlem borem vo vaitt korunk xokta, titleach mapan boropui korta. Dekhun boroitana boroupean aplea boroupacher khup dhean diunk zai. Aplea boroupachea eka-eka utracher lokx diunk zai. Tonddantlean borem utor bhair sorchem toxem boroupantlea utrachem ek-ek mannik boroun ieunk zai. Borem boroupa khaitr ami amchea monant toxe mannkam bhaxen vichar rigounk zai. Bore vichar rigounk ami borem vachop korunk zai.
Borea vicharanchem vachop boroinnaran vachpeank diunk zai. Burxem nhoi. Monant bore vichar aslear boroupeachem boropui tech dixentlean zata. Jivitachim muleam
boroupui tech nodrentlean zata. Jivitachim muleam boroupi vachpeank vanttunk xokta.
Vaitt vicharancho boroinnar vachpeancher koslo uzvadd ghaltolo? Oslea vaitt vicharancho boroinnar kosle dive laitolo?
Borem boroupi monis aplea boroupank lagon dusreacher vaitt probhav ghalunk xokonam. Borem boroupi monis aplea boroupak lagon dusreachem jivit chukiche dixentlean vochpak apunn karann zaunk xokonam; vachpeachea monant burxim chintnam bhorsunk xokonam. Dekhun vachpeache apleacher xirapui oddun haddunk xokonam.
Dusreak vaitt korunk xokonaslolo monis borench adharta. Soglleak borench fankarta. Hachich tor aiz soglleak goroz asa. Patkacho vixoi koddek dovrun ami borem vistarpacho proitn korunk zai. Burxem boroup sobheo mon’xak sobonam. Amche toklent ami jem bhortanv tench amchea tonddantlean bhair sorta. Monant hollxigavnne vichar bhorlear penantlean motiam koxim vhanvtelim? Hollxiguch vhanvteli nhoi? Mhonntoch, hollxiganvnnea boroupi mon’xak ami kitem mhonnpachem?
Fast Pen
(V-Ixtt www.v-ixtt.com)
(Name unknown)
Subscribe to:
Post Comments (Atom)
No comments:
Post a Comment