Novo Bharot Bhandcho Asa !!

Novo Bharot Bhandcho Asa !!
- Diogo Fernandes (Raia)


Xur, suotontr soinika,
Desak mellovnk suttka
Jivachi tuvem keli beporva,
Kuttumbachi-i kelina porva;
Kuddir sonsun hukumxaie chabkam,
Bonnkonnint sarlim vorsam,
Kitlexech zannamni variolem rogot
Desache suotontrae pasot,
Monar sonsun bhorpur tann
Kitleamni soddlona zait prann!

Desache suttke uprant
Amchea suotontr desant
Khubxea suttke zuzareamni
Deskarbhar gheun aplea hatamni
Dis-rat apleo tokleo zorovn
Promannikponnan vavr korun
Desachi udorghot kel’li asa.

Punn suotantr soinika,
Aiz konnui kortat tuchi bhumika,
Zal’lea porim te suttke zuzari
Tumi astana suttke odhikari,
Te zaun asat sondi-sadhu
Svotontrae follam kortat koddu
Tantlech zaun amdar khasdar
Pavle montripoddachea panvddear
Choddxe tantle zaleat pottie raza.
Punn tankam nivddun diloli porza;
Goribantli zali odhik lachar
Ani girestantli, odhik girest savkar.

Kalljidar, suotontr soinika,
Deask melloitana suttka
Inglez-purtugezank dhanvddaitana,
Tum tor kosoch bielona
Zalear aminch nivddun haddlolea
Hea protinidhiank amchea,
Tum aiz moneamni polleta,
Te choloitat astona ghoir karbhar
Zal’lea porim tanchich malmat’ta ?
Desant cholta astona lokxae sorkar!

Bollvont, suotontr soinika
Tukach sangonxem dista mhaka,
Tunch ghe mhunn fuddakar
Soronk ami-i mukhar;
Protek obhimani nagrik
Ani zavnk somajik soinik
Kiteak sot’techo durupeog kortoleank
Sodrevele denvoichi goroz asa
Desachi orthik girestkai pokortoleank
Koddok khast lanvchi asa
Somaz-konttokamadd zuzchem asa
Zokat chorancher guri galchi asa
Broxttachara add kranti korchi asa
Kallo-bazar nattak korcho asa
Margaiecher allabond haddcho asa
Goribi samkich sompoichi asa
Puri surokxa ani nit melloupachi asa
Ani amchea desache progoti vatt
Oddchonichea kantteamni zalea datt
Ti amin teagamni soroll korchi asa
Ani khori svontontrai
Toxich xudh lokxai
Amim melloupachi asa
Ani NOVO BHAROT BHANDCHO ASA.


Xur - Courageous
Snotontr Soinik - Freedom Fighter
Hukumxai - Dictatorship
Tann - Tension
Promanikponn - Honesty
Udorghot - Progress
Bhumika - Action, to take part, to act
Pottie (Ghillgo) - Epicure (One who is choice & dainty in eating and drinking
Protinidhi - Representative
Malmetta - Property
Allabond - Control
Bollvont - Valiant
Fuddakar - Initiate
Obhiman - Respect
Somajik - Social
Sotta - Power
Drupeog - Misuse
Orthik - Economical
Somaz Konttok - Antisocial
Zokatchor - Smuggler