Xanti Hatier Za Bhava

Xanti Hatier Za Bhava



Zor somaza pasot, tuka
Borem kainch korunk naka
Tum vaittui kainch korinaka
Punn dusreankui korunk
Addkolleo haddinaka
Ani somazacho dusman zavn
Kosloleant loll’tolo kiddo,
Tum zainaka.

Ugddea ani soroll,
Nazuk mona mollar
Durgam-adde ubharun
Tujea bhavache hok mostun
Oddchonnencho kantto,
Tum zainaka.

Kallzantleo vegllocharacheo
Vontteo moddun
Ekvottacho pul bandun
Ani moga sombond vaddovn
Zanti hatier za bhava.

Ghoracheo vontteo matr
Uddoinaka moddun,
Kiteak tantunt ravun
Sonvsar tozo cholouncho asa
Punn vonttim modhem
Svartak ani ragak matr
Vatt dovrinaka.

Kiteak svartan toiar kel’lo
Raga bomb ghalun
Nisonttonnacho uzo vonkhun
Ghor tujem;
Ek moga mondir, lhasun,
Ekvottacho ghorabo tuzo foddun
Sonvsar bhor ximpddainaka.

Kiteak hantlech protek veokti
Ek dis, veg-vegllea molar vavrun,
Dhakounk zonn ekleachi xeokti
Toch raga uzo ghevun,
Sobitaien Devan nettoilolo
Ani sudharlo sonvsar ho
Oronnem korun soddit, bhava!


- Diogo Fernandes (Raia)