Porki Amcho Bhes

Porki Amcho Bhes



Amchea desbhoktamni
Tea mahan mon’xamni
Aple jinnencho
Korun teag
Porki zulumxaecheo
Toddleo sankhlleo
Ani svotontr kelo
Amcho Bharot des.
Punn heach amchea
Svontontr desant
Lokxaechea rajeant
Des bhavddanchea hatant
Porki zala amcho bhes.
Protek rajki fuddari,
Zanv to magir
Gorib vo girest
Venchnnukam vellar
To gorib-dektteancho
Avddi umedvar
Punn nivoddtokuch
Girest – motteamlo
To amdar/khasdar.
Aplea ud’dear
Choddlea nontor
Visorta dil’lem utor
Thoim gavta dekhun taka
Duddvan khonn,
Ti khonddonk naka
Pikas nhoi gonn,
Duddvam netar
Ani sot’teachea bollar
Mon’xaponn visorta
Ho soitanalo dolal
Doveachem kallem korta
Ani goribamle korta alaval
Na taka maya
Na ili tori doea
Na khoro neai
Na surokxea-i
Sogloch goir vevhar;
Fulta kallo bezar
Ugteponnim chalu broxttachar
Kaide fokot kagdar
Broxttachari sasai;
Hi choddti margai,
Goribamli khata gottai
Desak haddta oskotai
Pokrun orthik girestkai.
Kaideacho kortana bhong
To dita taka boltoch rong
Konnankui iena zaunk dubhau
Ani apunn zata sau,
Dusrea venchnnukam velar
Mavna zait mhonn motam adhar.
Sodrer aslolo
Sorkaruch tor tagelo
Ani ailoloch sorkar
Tor oxench korit ravlo
Broxttacharamm boxttailolo
Bharot des amcho
Kednam xudh’ zat’lo
Ani labh svotontraiecho
Soglleank ek sarkho
Kednam gavtolo ?


- Diogo Fernandes (Raia)